Warbaahinta France 24 oo soo xiganaysa warbixin ay diyaarisay wakaaladda wararka ee AFP ayaa sheegtay in awoodda kooxda riddada Soomaaliya ay sii wiiqmayso isla markaana uu isa soo taraayo walaaca laga qabo in mujaahidiinta Xarakada Al-Shabaab ay la wareegaan guud ahaan dalka Soomaaliya.
Dadka wax falanqeeya ayaa sheegaya in kooxda riddada Soomaaliya ay wajahayso caqabado ay ka mid yihiin dhabar-jab xooggan oo ka haysta saaxada dagaalka iyo weliba taageeradii ay u fidin jireen Mareykanka iyo Midowga Afrika oo haatan u muuqata mid sii yaraanaysa, sida lagu sheegay warbixinta AFP.
Sidoo kale warbaahintan oo laga leeyahay dalka Faransiiska ayaa carabowday guullihii ay mujaahidiintu kasoo hooyeen labada Shabeelle, iyadoo deggaannadii Raayada laga taagay ee ka tirsanaa labadaasi wilaayo ku sifaysay goobo muhiim ah oo labada dhinac kaga beegan caasimadda Soomaaliya ee Muqdisho.
Matt Bryden oo ah falanqeeye ku takhasusay isku-dhacyada ayaa wakaaladda wararka AFP sheegay in kooxda riddada Soomaaliya ay ka caado-dhigatay in mar walba oo foodda la is-daro ay gorodda laalaadiso, had iyo goorna ay firxadaan marka lagu kulmo furimaha dagaalka, halka mujaahidiintuna u hamuun-qabaan ayuu yiri soo afjaridda cadawgooda.
Waxa uu xusay Matt Bryden in kooxda Riddadu ay lumisay dhul istaraatiijiya oo ay ku jiraan saddex ka mid ah afarta Buundo ee Shabeellaha hoose. Isla markaana haatan aanay jirin awood ku hartay kooxda riddada maadaama ay furimaha dagaalka ku shubtay askarta booliska iyo kuwa xabsiyada ilaaliya ee asluubta.
“Waxaan aragnaa caddeymo muujinaya ciidan isku dhex yaacsan oo dib u guranaya,” Sidaas waxaa AFP u sheegay Matt Bryden. Waxaanu intaas raaciyey in dadka reer Muqdisho ay haatan filashadoodu tahay in mar kaliyaata uun ay kusoo baraarugaan mujaahidiinta oo camimay lana wareegaan gabi ahaanba magaallada Muqdisho.
Matt Bryden oo muujinaya liidnaata awoodeed ee kooxda riddada ayaa tusaale u soo qaatay weerarkii uu sida dirqiga ah uga badbaaday Gurguurte ee dhawaan isaga iyo kolonyadii uu la socdayba ay mujaahidiintu ku beegsadeen afaafka hore ee madaxtooyada, oo uu ku sifeeyey hawl-gal bannaanka keenay awoodda xooggan ee mujaahidiintu ku leeyihiin gudaha caasimadda Muqdisho.
Warbixintu waxay sidoo kale xustay in walaacaasi ku gedaaman kooxda Villa Somaliya ay u dheer tahay khatar ah in la dhimo taageeradii lala barbar taagnaa ee ka imanaysay dalalka shisheeye, iyadoo weli aanay Washington xaqiijin kaalmadeeda dhaqaale ee ku aaddan duullaanka AUSSOM.
“Kaalmada amniga ee dowladda waa la jarayaa, gaar ahaan kaalmada Mareykanka, tabarucaadka Yurub ayaa sidoo kale yaraan doona, waxaanay arrimahani sare u qaadayaan in dheelli-tirka awoodeed uu isugu biyo-shubto dhanka mujaahidiinta Al-Shabaab ” ayuu yiri Bryden.
Warbixintan ay diyaarisay wakaaladda AFP ayaa kusoo aadaysa xilli aad looga dayrinayo masiirka maamulka Muqdisho, waxaana ka mida dadka ka walaacsan xaaladdaasi, xoghayihii hore ee Gaashaan-dhigga Ingiriiska Gavin Williamson, oo maalmo ka hor shaaciyey in gabi ahaanba ay fashilantay kooxda riddada Soomaaliya.