Sida uu daabacay Daily Express, oo kamid ah warbaahinada dalka Maraykanka, ayaa sheegay in ka badan 60 khabiir oo sirdoon shisheeye ah ay 24-kii saacadood ee ugu dambeeyay ka baxeen magaalada Muqdisho, kaddib markii Safaarada Mareykanka ee Muqdisho ay sheegtay in 11-kii November 2025 la jabsaday nidaamka E-visa ee kooxda ridada Soomaaliya.
Xubnahaan Sirdoonka ah ayaa bixitaankooda yimid kadib markii la sheegay in kooxo aan la garanaynin ay gacanta ku dhigeen xogta in ka badan 35,000 qof oo isticmaalay nidaamka E- Visa oo ka kala yimid dalal ay ka mid yihiin Mareykanka.
Xogta la jabsaday waxaa ku jiray: magacyada, sawirrada, taariikhaha iyo goobaha dhalashada, cinwaanada, e-mailada, xaaladda guurka, iyo cinwaanada guryaha.
Daily Express ayaa sheegtay in safaaradaha shisheeye ee Muqdisho ay joojiyeen isticmaalka nidaamka E-visa ee kooxda ridada, iyaga oo ka cabsi qaba in xogtooda la faafiyo.
Warbixinnada caalamiga ah ayaa sheegay in Imaaraadka Carabta ay Soomaaliya u adeegsadeen marin ay hubka u mariyaan dagaalyahannada RSF ee Suudaan.
Xogta la helayo sheegaysa in macluumaadka la jabsaday ay sidoo kale lagu ogaaday inay qeyb ka yihiin calooshooda u shaqaystayaal ka yimid dalka Kolombiya inay soo mareen garoomada Soomaaliya kahor inta ayna gudbin Suudaan.
Safaarada Mareykanka ee Muqdisho ayaa dhawaan sheegtay in la jabsaday nidaamka lagu kaydiyo xogta dal-ku-galka E-visa kadib markii baraha bulshada lagu faafiyay sawirro iyo baasbooro aad u badan oo dadka baahiyay ay sheegeen in ay yihiin dad Soomaaliya usoo safray oo xogtoodii la jabsaday.