Wargeyska The Economist ayaa soo tebiyey warbixin ku saabsan mashruuc dijitaal ah oo cusub oo ay hirgeliyeen saxafiyiin iyo dhaqdhaqaaqayaal Suuriyaan ah, kaas oo loogu magac daray Maktabka Xabsiyada Suuriya.
Mashruucan ayaa ah aarshiif iyo xusuus-qaran loogu talagalay in lagu diiwaangeliyo xadgudubyadii ka dhacay xabsiyada Suuriya, gaar ahaan Xabsiga Saydnaya, oo loo arko mid ka mid ah xarumaha ugu naxdinta badan ee nidaamkii Bashar al-Assad.
The Economist waxay sheegtay in webkaan tignoolajiyadeed ay bixiso muuqaal 360-degree ah, taas oo booqdaha u oggolaanaysa inuu dhex maro qolalka dilalka iyo jirdilka, isla markaana uu dhegeysto cadeymo muujinaya naxariis-darrada ka jirtay xabsiyada Al-asad.
Waxaa kale oo lagu soo bandhigayaa magacyada saraakiishii mas’uulka ka ahayd xadgudubyadaas iyo habraacyadii maxaabiista lagu mariyey halkaas.
Warbixintu waxay xustay in tan iyo xilligii Xaafid al-Assad ilaa xukunkii wiilkiisa Bashar, xabsiyada loo adeegsaday in lagu hayo mucaarad kala duwan, halka markii kacdoonkii 2011 uu y baddalay xasuuqa dadka dulmiga diiday, ay xabsiyadu noqdeen xarumo dil iyo xasuuq.
The Economist waxay ku tilmaantay Saydnaya inuu ahaa “meel safarka maxaabiistu ku dhammaado” – kadib wareegyo badan oo jirdil iyo baaris ah.
Waxaa halkaas lagu fulin jiray xukunnada dilka, oo badanaa ahaa dil toos ah ama in qofka maxbuuska ah la garaaco ilaa uu ka dhinto, xilliyada saqda dhexe.
In kasta oo nidaamkii Assad uu dhacay, haddana boqolaal kun oo Suuriyaan ah ayaa weli raadinaya ehelkooda la waayey. Mashruucan cusub ayaa u noqon kara il muhiim ah qoysaska dhibbanayaasha, iyo taariikhyahannada.