Bannaanbaxyo ballaaran ayaa lagu soo warramayaa inay ka dhaceen gobolka Canfarta ee ku hoos-jira gumaysiga Itoobiya, kuwaas oo looga soo hor-jeeday qabsashadii ay dhawaan maleeshiyaadka TPLF kula wareegeen tuullooyin ka tirsan gobolka Canfarta.
Mudaharaadkan oo muddo labo cisho ah socday ayaa dadka deggaanku ay ku muujiyeen diidmadooda ku aaddan deggaannadaasi ay la wareegeen maleeshiyaadka TPLF, oo ay ka mid yihiin tuulooyinka Wara’a, Karfatu, Milki, Mila, Warqa, Doya, iyo Qela Gobe oo ka tirsan deggaanka Tonsa Kebele ee degmada Megale ee gobolka Canfarta.
Ilo deggaanka ah oo la hadlay wargeyska Addis Standard ayaa xaqiijiiyey in maleeshiyaadka Tigray ay la wareegeen dhammaan tuulooyinkaasi ka tirsan gobolka Canfarta, isla markaana dad badan oo deggaanka ah lagu qasbay in guryahooda ay ka qaxaan.
Qofka u warramay wargeyska ayaa sidoo kale sheegay in dibad-baxyo la qabtay Isniintii lasoo dhaafay, si loogu baaqo ayuu yiri maleeshiyaadka Tigrey-ga in ay ka baxaan goobaha ay qabsadeen, si dadka barakacay dib loogu soo celiyo guryahooda.
Sidoo kale qof ku sugan degmada Megale ayaa wargeyska u sheegay in Tobanaan kun oo qof oo ka qaxay deggaannadaasi ay u barakaceen meel la yiraahdo Arori oo ku taalla Tonsa Kebele, halka qoysas kale oo ka mida barakacayaashuna ay ku hoydaan tuulooyin ku dhow ee Adu iyo Faro.
Wakaaladda wararka AFP ayaa sheegtay in qof ku sugan gobolka Canfarta oo ay xiriir la samaysay uu u xaqiijiyey weerarkaasi, isla markaana uu sheegay in ku dhowaad 18,000 oo qof, oo u badan haween iyo carruur, ay barakaceen, xaaladdooda nololeedna ay aad u liidato.
Masuul ka tirsan degmada Megale oo la hadlay Addis Standard ayaa xaqiijiyay in Talaadadii shalay, dadka ku nool degmooyinka Megale, Yalo, Berahle, Awra, iyo Uwa ay qabteen dibadbaxyo lagu cambaareynayay weerarka maleeshiyaadka TPLF.