Ugu yaraan 70 qof ayaa dhintay kadib markii dooni ay la socdeen tahriibayaal ka ambabaxay xeebaha Galbeedka Afrika ay ku degtay xeebaha Mauritania, sida lagu sheegay war-saxaafadeed ka soo baxay wasaaradda arrimaha dibadda ee dowlada Gambia.
Shilkaasi oo ah mid ka mid ah musiibooyinkii ugu dhimashada badnaa ee ka dhaca marin-biyoodka tahriibka ee gobolka sannadihii ugu dambeeyay.
Warbixinta wasaaradda xukumada Gambia ayaa intaas ku dartay in ku dhowaad 30 qof oo kale ay weli la’ yihiin, isla markaana laga cabsi qabo inay dhinteen. Doonta oo la sheegay in ay ka shiraacatay Gambia, ayaa waxaa saarnaa ku dhowaad 150 qof, oo intooda badan ahaayeen dhalinyaro u dhashay Gambia iyo Senegal.
Maamulayaasha dalka Mauritania ayaa xaqiijiyay in la soo saaray 70 meyd ah maalmaha Arbacadii iyo Khamiistii, halka 16 ruux oo kale la badbaadiyay. Goobjoogayaal la hadlay wakaalada wararka Reuters ayaa sheegay in tirada dhimatay ay ka badan karto boqol qof.
Badda Atlaantiga ee u dhexeeysa xeebaha Galbeedka Afrika iyo jasiiradaha Canary ee Spain ayaa noqday mid ka mid ah marinada ugu khatarta badan ee tahriibayaasha Afrikaanta ah ay u maraan Yurub.
Xoga kasoo baxay midowga gaalada Yurub ayaa mujinaya in sannadkii hore kaliya jaziirada Canaries gaaraan in ka badan 46,000 oo tahriibayaal ah, Isla sanadkaa, ururka waxa loogu yeero Xuquuqda Aadanaha ee Caminando ayaa isagana sheegay in in ka badan 10,000 qof ay ku dhinteen isku dayga socdaalkaasi, taas oo ah koror 58% ah marka loo barbardhigo 2023-kii.