Ugu yaraan 45 qof oo rakaab ah una socday gudashada Cumarada, ayaa geeriyooday kadib shil gaari oo saaka ka dhacay jidka isku xira magaalooyinka barakaysan ee Makka iyo Madina ee dalka Sacuudiga.
Shilkan oo ay boolisku xaqiijiyeen ayaa yimid kadib markii ay isku dhaceen baabuur bas ah oo ay saarnaayeen dadka cumraysanayay iyo gaari kale oo sida la sheegay ahaa booyad shidaal, waxaana halkaasi ka kacay dab aad u xooggan oo kordhiyey wax-yeellada shilka.
Sida ay xogtu tibaaxayso dadkan muslimiinta ah ee cumarada u socday ayaa u dhashay dalka Hindiya, waxaana la xusay in badankoodu ay ka yimaaddeen magaalada Hyderabad. Iyadoo wararka qaar ay sheegayaan in dadka dhintay ay ku jireen caruur iyo haween.
Gaariga baska ah ayaa sida ay warbaahinta tebinayso kasoo ambabaxay magaalada Makka, waxaanu kusii jeeday magaalada Madiina, balse shilkan ayaa haleelay isaga oo maraaya deggaan lagu magacaabo Mufrixaat oo 160 km u jira Madina.
Dadka qaar ayaa lagu soo warramayaa in ay hurdeen xilliga uu dhacayey shilkan oo sida la sheegay uu ka badbaaday hal qof oo kaliya, kaas oo dhaawac soo gaaray lagula tacaalayo mid ka mida cisbitaallada.
Kooxaha gurmadku waxay sheegeen in meydadku gebi ahaanba gubteen, taas oo caqabad ku noqonaysa aqoonsiga dadka dhintay. Waxaana qof ka mida ehellada dadka geeriyooday oo jooga Heydrabad uu sheegay in qoyskiisa oo dhami ay ku dhinteen shilkaasi.
Ra’iisul Wasaaraha Hindiya, Narendra Modi, ayaa xaqiijiyey shilkaasi, waxaanu u tacsiyeeyey ehellada dadka geeriyooday. Waxaanay qunsuliyada Hindiya ee Jiddah ay isku dayaysaa in gurmadka hawl-galkaasi oo weli socda ay qayb ka noqoto.
Dadka muslimiinta ah ee xajka ama cumrada u aada Makka iyo Madiina ayaa mararka qaar la kulma shilal sababa dhimashada dad badan oo muslimiin ah, iyadoo maamulka daba-dhilifka ah ee Sacuudigu uu awoodda saaro oo kaliya sidii uu lacagaha uga urursan lahaa muslimiinta martida ah.